კონფერენციის პირველ ნაწილში სიტყვით გამოვლენ ქართველი ბიზნესმენები, რომლებმაც უკვე წარმატებით დაიმკვიდრეს თავი უზბეკეთის ბაზარზე. ისინი გაუზიარებენ მონაწილეებს საკუთარ გამოცდილებას, დეტალურად ისაუბრებენ უზბეკეთის ბაზრის თავისებურებებზე, გამოწვევებსა და შესაძლებლობებზე.

კონფერენციის მეორე ნაწილში ჩაერთვებიან ადგილობრივი სხვადასხვა სექტორის წარმომადგენლები, მათ შორის — ეკონომიკის სამინისტროს, ინვესტიციების სამინისტროს და ასევე ამერიკის სავაჭრო პალატის (AmCham) წევრები. ისინი გააცნობენ აუდიტორიას უზბეკეთის ბაზრის არსებულ გამოწვევებს, საინვესტიციო გარემოს, კომპანიების რეგისტრაციისა და საქმიანობის დაწყების პროცედურებს. გარდა ამისა, წარმოდგენილი იქნება ინფორმაცია იმ საკონტაქტო პირების შესახებ, რომლებიც დაგეხმარებიან აღნიშნული პროცესების სწორად და ეფექტიანად განხორციელებაში.

კონფერენციაზე საშუალება გექნებათ, შეხვდეთ ქართველ და ადგილობრივ ბიზნესმენებს, გამართოთ B2B შეხვედრები და გაეცნოთ უზბეკურ ბაზარსა და მის პერსპექტივებს.